مغامرات فى نقابة الصحفيين

كانت مغامرة من أول لحظة فكرت انى رايح نقابة الصحفيين اللى بتطلع كتير فى التلفزيون والواحد مش بيعرف يشوفها من كتر الامن المركزى اللى محوطها من كل ناحية والمتظاهرين اللى قاعدين على سلمها جايين من كل حتة يطالبوا بحقوقهم اللى ضاعت
اول حاجة الواحد ماكنش عارف ايه النظام هناك فعمل كل الاحتياطات اللازمة الواحد حلق دقنه ولبس روش وقرا ورده فى البيت علشان مش هاعرف آخد معايا المصحف وسبت موبايلى الغالى فى البيت وخدت موبايل اخويا الصغير"من تداعيات التجربة السابقة انهم اخدوا الموبايل الجديد ورجعوا تانى بس الواحد ما يضمنش" ودعيت ربنا يسترها وتجهزت نفسيا للقضاء عطلة فى أى منتجع من منتجعات الدولة
وفجأه صاحبى اللى المفروض جاى معايا بيتصل يعتذر قلت شكلها باين من أولها
نزلت ورايح أركب علشان السفر فاذا اللى اعتذروا كانوا متفقين يروحوا سوا بعربية وانا اتقلشت من الموضوع "الكلام الك يا جارة"
وصلت مصر مافيش حد خاااالص ولا أمن ولا حتى بنى أدميين مشيت شوية واذا الواحد لقى نفسه على سلالم نقابة الصحفيين
الصرح عظيم وله رهبة ومكانه خاصة اذا رأيته ودخلته لاول مرة زى محسوبك
دخلت من الباب وكأنى عديت باب سحرى لمملكة نارنيا
جوه غير بره بلد غير البلد
بوسترات فى كل حته" أفرجوا عن خالد" "أريد الرجوع الى أولادى"عبد الجليل الشرنوبى
كيف تسقط نظاما دكتاتوريا - معا لنتخلص من الزمرة الفاسدة
مطالب الصحفيين استقالة رئيس الجمهورية

أنا صراحة ماكنتش مصدق نفسى
فعلا نقابة الصحفيين هى واحة الحرية فى صحراء ذلك الوطن الغابر

اول ما وصلت ماكانش فيه حد جه ولا حتى بتوع القاهرة
وكان بقى منتدى القاهرة الرابع والمؤتمر لمناهضة الصهويونية العالمية
كان المؤتمر سوق أفكار
أول ناس شفتهم ولأول مرة فى حياتى "فعلا مش بهزر" الاشتراكيين
كان الواحد بيسمع الاسم وفاكر ان الناس دى خلصت بعد1990
المهم
شوفت ناس من حزب الكرامة وشوفت ناس من القوميين العرب
وناس من حزب الله متحدث اعلامى باسم الحزب
ومن فلسطين انتظروا المفاجأه!!!!!!!!!الجبهه الشعبية
6مقاعد فى البرلمان
فين حماس فين فتح
طب حماس والحكومة الرشيدة منعتها بس كان موجود أخو اسامة حمدان وهو حقوقى عايش فى اوروبا
أمال فتح فين وللا خلاص بقت صديق للصهيونية
مش موضوعنا
كان ما يميز المؤتمر الوجود الاجنبى
كان هناك وفد من اسكتلنده ودى كده فريح بريطانيا حبتين جايين من أخر الدنيا استنا وشوف مين تانى
وفد من كندا ضد الحرب الامريكية وداع لخروج القوات الكندية من افغانستان
مستغرب ايه رأيك بقى وفد من كوريا الجنوبية وجايبين معاهم صور مظاهرات اتظاهروها قدام السفارة المصرية لحرية المصريين ضد حسنى مبارك

طبعا بطل المؤتمر وبلا منازع هم الاخوان المسلمون وهم طلبة واساتذة جامعة ودكاترة ومهندسين كل حاجة يعنى

الدنيا زحمة جدا وكل واحد بيرتب بضاعته

بدأت الندوات وكم من المعلومات الغزيرة اللى بيدخل مخك كأنك بتعمل داونلود عالنت من كمبيوتر رئيس الوزراء شخصيا
صاحبى وحبيبى خد جايزة محترمة فى مسابقة الشعر أمام الشيخ أمين الديب والشاعر جودة
ألف مبروك طبعا ومستنيين العزومة

حضرنا فى نهاية اليوم ندوة للدكتور عصام العريان والكلام فيها كان ميه ميه عن كيفية اسقاط الديكتاتوريات
وكان فى الحلقة النقاشية د.جورج اسحق قيادى فى كفاية وعبد الغفار شكر قيادى فى التجمع
اترك التفاصيل الى احد اخوانى اللى سجل الندوة
المهم بعد ماخلصت الدكتور عصام لقى نفسه متحوط بجيش من شباب الاخوان
اللى ياخد منه اوتوجراف واللى يتصور معاه وهو يقولهم بتتصوروا ليه هتروحوا فى داهية
وناس اتصورت مع جورج اسحاق
المهم

تانى يوم
د.محمد حبيب يدير ندوة عن الصراع العربى الاسرائيلى
برضه خلصت الندوة واجتمع بقه مع الشباب وقعد يكلمهنا عن المحليات و وجهات النظر فيها واجاب عن اسئلة معظم الشباب واتصور معاهم
شفت هناك طبعا عبد الحليم قنديل حاضر فى ندوتين الاولى البلطجة فى الجامعات والثانية مستقبل حرية الصحافة فى مصر
الشخصية اللى كان نفسى اقابلها من زمان وهو الدكتور عزام التميمي صاحب قناة الحوار "وانا اللى مصور له الصورة اللى فى المقال"
صراحة القناة التى اعشقها وهى فى ترتيب القنوات بعد الاقصى مباشرة
الراجل ده -لو حد مشعارفه- دماغ عالية مووووووت وفكر اسلامى راقى جدا
حتى لما استضافوه على البي بي سى الانجليزى كان بيحرج المذيع بكلامه
المهم قابته واتكلمت معاه شوية وصورتين على الماشى وحضرت ندوته عن الاسلاموفوبيا فى الغرب
وكنت قاعد تقريبا مفيش غير 4 أو5 مصريين والباقى كله أجانب

نيجى للتقيل
مؤتمر الطلاب
كان فيه ممثلين عن كل الطلاب
الاخوان
الاشتراكيين
الغد
العمل
الكرامة
الجبهة الديموقراطية
وكلمات كثير بس الواحد زهق وقام مشى
وكلنا كوشرى من عند راجل اسمه أبو طارق أو مول الكشرى اربعة طوابق كشرى
أصغر طبق بخمسة جنيه
أكلنا ومشينا علشان كنا حاجزين عربية من الصحبح
بس الحلو ما يكملش
الراجل قلنا هروح أعمل مشوار صغير فى التجمع الخامس
واحنا فى وسط الطريق والدنيا صحراء من حولنا وفى الليل الدامس
لقيناه بيقول انزلوا هنا
المهم طلع فى سوء تفاهم
وانا باعتذر لصاحب العربية عن الاحراج
والواحد نزل ساعتها من العربية مهيس على الآخر وعتريس يقولكوا هو اللى كان شاهد
وركبنا اتوبيس وروحنا فى سلام وأمان
وقبل مانروح شربنا عصير قصب كمان
وكل سنة وانتوا طيبين
وعقبال المؤتمر الجاى

كل العالم عايز يتغير الا انت يا مصر

دهشت جدا لما شفت باراك أوباما وشعبيته تزداد حبة حبة الى ان أصبح رمزا من رموز أميركا فى هذا الوقت
وذلك بالرغم من لونه الاسود ووالده المسلم
الرجل لعب اللعبة كويس واتكلم عن التغيير فى أكبر بلد فى العالم وعلى عكس التوقعات استجاب الشعب الامريكى لنداءات التغيير وصوت البيض قبل السود فى بعض الولايات لباراك أوباما والنساء قبل الرجال

فى ماليزيا صوتت نسبة كبيرة من الشعب الماليزى للمعارضة وخسر الحزب الحاكم الاغلبية المطلقة
فى فرنسا والمانيا تغيرت الاحزاب الحاكمة ولو الى الاكثر تطرفا

الشاهد فى الامر أن الشعوب والامم فى كل العالم لا تطيق أن يحكمها نفس التيار أو الفكر طول الحياة الكل يتغير
ولو كان الفكر مثالى لتلك الشعوب لغيرت الافراد

طبعا القانون ده لا يسرى فى مصرنا الحبيبة
وبتوع الصحافة القومية بيطلعوا علينا كل يوم
ان الناس فى مصر تكره حاجة اسمها التغيير
وانها متفائلة وحابة الحياة تحت ظلال السيد الرئيس
وكمان كتبوا لوحات باسمنا وان 70 مليون مصرى يؤيدوك يا ريس
مع ان المفروض 100 مليون احتسابا للاموات اللى لسة بتصوت من أيام عبد الناصر

التغيير فى مصر والعالم العربى قادم قادم لا حالة
واذا ماكانش بمزاجهم هيبقى غصب عنهم
وكلنا شوفنا لما صدام امعن فى اذلال شعبه وطلع عينهم
جابوه على المشنقة اللى كانوا اصحبه وبيدعموه الامريكان

المطلوب الآن من المعارضة المصرية بكل طيفها
هو تغيير النظام واقامة دستور توافقى بين القوى السياسية والتصويت عليه

هذا هو التغيير المنشود
الذى سيشعر به المواطن المصرى

والا فالطاولة ستنقلب على الجميع
والشعب الجائع لن يستطيع أن يوقفه أحد
ولا حتى الاخوان المسلمين

موقع فلسطين الآن يكشف كافة تفاصيل تعذيب قيادات القسام فى مصر

غزة- فلسطين الآن- خاص- شهادات واعترافات متطابقة ، تحقيقات أمنية تتعلق بالمقاومة الفلسطينية وقياداتها ، أساليب تعذيب وحشية ، تعرية كاملة ، صعق بالكهرباء ، شبح للمحتجزين هناك ، محاولة انتزاع معلومات أمنية خطيرة تتعلق بالجندي الإسرائيلي الأسير لدى المقاومة ، والتحقيق حول أماكن قيادت عسكرية من كتائب القسام كالقائد العام محمد الضيف والقائد أحمد الجعبري ، محققون وضباط مصريون من جهاز أمن الدولة يفتخرون ويشبهون أنفسهم بالمحققين الصهاينة هناك ، هي أبرز العناوين التي كانت واضحة من خلال الشهادات الموثقة والمسجلة لدى شبكة فلسطين الآن الإخبارية عبر عشرات الحالات ممن أفرج عنهم من المحتجزين من أبناء حركة حماس في السجون المصرية .

لمشاهدة الملف كاملا هنا

طبعا الموضوع بلا أى تعليق

اقرأ معى المسابقة الكبرى فى الجامعة

طبعا المسابقة صعبة جدا
امن واستقرار وللا ديموقراطية وحريةوللا سياسة داخلية وياحلاوة السياسة الخارجية ويا جمال التنمية الاقتصادية اللى عايشنها
أمريكا بتحسدنا على رغيف العيش
اترك المجال لمن يريد الجائزة أن يكتب على راحته
و انا اللى هدى الجايزة المرة دى مش الجامعة بس مش فلوس طبعا طبعا
عمار يا جامعات مصر

ملحوظة:
الميعاد الرسمى للمسابقة خلص فماتحاولش تكتب وتنافق

التط بيع

طبعا الموضوع مش جديد وادينا مدفونين فيه بقالنا أكتر من 25 سنة

الجديد فى الحكاية ان التطبيع لم يعد فى الاراء والافكار فمصر الان فى الحضيض
بيعنا الاراضى وبيعنا المصانع وبيعنا الشركات
والأهم من ده كله بيعنا ضميرنا
وبيعنا اخواتنا
وقبضنا على قفانا كفوف سخنة من امريكا واسرائيل
واللى شغالين معاهم
استنى كده !!! أيه ياعم ده برضه مش جديد
آه فكرتنى الجديد هو خط العار
قصدى خط الغاز معلش "خطأ مطبعى" اللى بيودى غاز المصريين لليهود
انا مش عارف الحكاية دى متكتم عليها من كله
وهى مصبية كبيرة كده الطائرات والدبابات فى اسرائيل هتحول غاز وهتمشى بالطاقة النظيفة
وهنقتل الفلسطينيين بأيدينا الاتنين فين سيادة المفتى وشيخ الازهر
وللا الكلام يجيى على الصواريخ بس (تصريح لشيخ الأزهر قال فيه أن الصواريخ الفلسطينية عبثية وتضر أكثر مما تفيد)والله!!! ياشيخنا
وفى وسط محرقة غزة الاخيرة صدرت تقارير عن توقف مصر عن استكمال النمشروع وضخ الغاز لاسرائيل
هل تصدق؟؟؟؟
أنا ما صدقتش
وفعلا كلامى كان مظبوط
لقد تم التوقف عن العمل فى المشروع لسبب واحد وهو أن هناك خلل كبير حدث كان وللأسف سي}دى الى حريق خطير يقتل فيه الصهاينة
وحرصا من الحكومة المصرية على حياتهم الكريمة قرروا وقف المشروع لحين اصلاح الخلل
والله عمار يا حكومة
بس لو تخافى على حياتنا كده
من الآخر التطبيع يعنى هتبيع
كل حاجة حتى الغاز اللى كنا فرحانيين بيه أديه اتباع وابقى قابلنى

للعمالة وجوه كثيرة

يستطيع المرء أن يوصف العمالة انها العمل لمصلحة العدو فيما يخالف مصلحة الوطن
وفى عالمنا العربى وجوه كثير ة للعمالة من أول العميل السري الذى يتقاضى المال حتى يأتى ببعض معلومات عسكرية للعدو
حتى تصل الى أوجه الشراكة مع العدو لتصفية الوطن باكمله للقضاء على روح الامل والتغيير والنهضة فى مجتمعاتنا حتى يصبح وجود الطرفين هو ضرورة قصوى للطرفين فلا ذاك يستطيع الاستغناء عن الداعم الرئيسى له ولا العدو سيجد أفضل منه يدير البلاد
وكما قال الدكتور تميم البرغوثى فان الانظمة تحتفظ بقدر ضئيل من الشرعية يبقى الناس تحت امرتها لانها تعمل فى بيئة دولية تقر عليها افعالها التى لا تأتى أبدا من قرارات شعبية
وبناء على ذلك فهى لا تستطيع ان تواجه الشعوب وتصرح بعملها للمحتل ولا تستطيع أن تواجه المحتل وتعمل لصالح نهضة الوطن
وبذلك فتلك الانظمة تسمى الوسيط بين الحاكم الفعلى والشعوب واذا لم تحتفظ تلك الانظمة بقدر ضئيل من الشرعية فما حاجة الدول الكبرى لجعل وسيط فاذا كانت الثورة ستندلع ولو قاموا بتأخيرها فهم خير من يحكم البلاد مباشرة
من هنا نستطيع فعلا ان نفسر تلك المشاهد المتضاربة حولنا فى المنطقة فتلك الدولة لا تعترف باسرائيل وعلى الرغم من ذلك فان بترولها يحرك ماكينة الحرب الاسرائيلية تجاه اخوتنا وتلك تقول ان العلاقات بيننا والصهاينة هى فى صالح الوطن وهى فى صالح الامة العربية نرى من تلك الانظمة ما يشيب لها الوليد
مثال حق على ذكره فى ذلك الموضوع وهو تعامل الامن المصرى مع الفلسطينيين المحتجزين فى مصر منذ فترة
تبين بعد الافراج عن قيادات القسام وعندما تبين أن مجموعة من قيادة القسام فى رفح تشترى البضائع قبض عليهم وتروى قصصا لمن كان محتجزا معهم أن الأمن المصرى يسألهم عن مكان الجدنى الاسرائيلى شاليط ويسألهم عن تواجد أبو العبد ساعات القصف وما هى تحركاته وتم تعذيبهم لدرجة كبيرة وفقا لموقع فلسطين الآن

أرجو أن تكون تلك الاقوال غير صحيحة وأن هذا لم يحدث اطلاقا